सत्तारुढ नेकपा एमालेको झलनाथ खनाल र माधव नेपाल समूहका २० सांसदले अन्ततः राजीनामा गर्ने भएका छन् । माधव समूहका नेताहरुले राजीनामा दिने भएपछि अब जसपाको महन्थ ठाकुर पक्षले जेसुकै निर्णय गरे पनि काँग्रेस सभापति शेरबहादुर देउवाका लागि बहुमत पु¥याउने बाटो खुल्ने भएको छ ।
प्रधानमन्त्री ओलीले संसदमा बहुमत गुमाएपछि देउवाको नेतृत्वमा नयाँ सरकार बनाउन एमालेको नेपाल पक्षको सहयोग अपरिहार्य हुने भएपछि कांग्रेसले राजीनामा गराएरै छाड्ने योजना बनाएको छ । एमाले सांसदले देउवालाई सघाउनभन्दा पनि पार्टीमा एकलौटी गर्दै आएका ओलीलाई पुनः प्रधानमन्त्री बन्नबाट रोक्न राजीनामा गर्ने तर्क नेपाल पक्षको छ ।
गत २७ गते प्रतिनिधि सभामा प्रधानमन्त्री ओलीलाई विश्वासको मत देखाउन भएको मतदानमा माधव पक्षका २८ जना सांसद अनुपस्थित भएका थिए । त्यसदिन उनीहरुले राजीनामा नगर्ने बरु संसदमा अनुपस्थित हुने निर्णय गरेका थिए । यो समूहका सांसदहरुले मत नदिएको र जसपा पनि सरकारको विपक्षमा गएपछि ओली विश्वास पाउन नसकेर पदमुक्त भएका थिए ।
देउवालाई सहयोग पुग्ने गरी राजीनामा दिने सांसदलाई उपनिर्वाचनबाट जिताउने सुनिश्चितता नेपाली कांग्रेस र माओवादीले गर्ने भएका छन् । उपनिर्वाचनमा यी दुई पार्टीले आफ्ना उम्मेदवार नउठाएर नेपाल पक्षका उम्मेदवारलाई सहयोग गर्नेछन् ।
नेता नेपाल पक्षका २० सांसदले राजीनामा पत्रमा हस्ताक्षर गरेर नेता नेपाललाई बुझाइसकेका छन् । अब उपयुक्त समयमा नेता नेपालले राजीनामापत्र संसद सचिवालयमा बुझाउने जनाइएको छ ।
यी हुन् राजीनामा दिने सांसद र खाली हुने निर्वाचन क्षेत्र –
झलनाथ खनाल – इलाम १
माधवकुमार नेपाल – काठमाडौं २
योगेश भट्टराई – ताप्लेजुङ
जयकुमार राई – सुनसरी १
भवानी खापुङ – तेह्रथुम
यज्ञराज सुनुवार – ओखलढुंगा
गणेश पहाडी – सिन्धुली १
पवित्रा निरौला खरेल – झापा २
जीवनराम श्रेष्ठ – काठमाडौं ८
नारायण खतिवडा – नुवाकोट १
विरोध खतिवडा – मकवानपुर २
सुरेन्द्र पाण्डे – चितवन १
घनश्याम भुसाल – रुपन्देही ३
गोकर्ण विष्ट – गुल्मी १
मेटमणि चौधरी – दाङ–१
झपट रावल – कैलाली–२
दीपकप्रकाश भट्ट – कञ्चनपुर ३
भीम रावल – अछाम १
कृष्णलाल महर्जन – ललितपुर २
सोमप्रसाद पाण्डे – पाल्पा २
