दाङको तुलसीपुर उपमहानगरपालिकाले आयोजना गरेको जेष्ठ नागरिक अवलोकन भ्रमणका क्रममा गाडी दुर्घटना हुँदा १३ जना घाइते भएका छन्। दुर्घटना शनिबार साँझ साढे ४ बजे तुलसीपुर–१८, हेमन्तपुर नजिकै भएको हो।
तुलसीपुर उपमहानगरपालिकाकी महिला, बालबालिका तथा सामाजिक विकास शाखा प्रमुख माया श्रेष्ठको नेतृत्वमा जेष्ठ नागरिकहरुको टोली प्युठानको स्वर्गद्वारी मन्दिर दर्शन गरी फर्किने क्रममा बा २ ख ८७९२ नम्बरको मिनिबस र बुटवलबाट तुलसीपुरतर्फ गइरहेको बा ३ ख ७९५७ नम्बरको सवारी ठोक्किँदा दुर्घटना भएको इलाका प्रहरी कार्यालय तुलसीपुरले जनाएको छ।
दुर्घटनामा तुलसीपुर-१२ का ७१ वर्षीय लेखराज बस्नेत, उनकी पत्नी जयन्ती बस्नेत, तुलसीपुर-४ का ७७ वर्षीय पूर्णबहादुर खड्का, उनकी पत्नी अमृता खड्का र छोरी हरिकला केसी (५२), तुलसीपुर-४ कै ८३ वर्षीय जसिराम खड्का, तुलसीपुर-१० का ६३ वर्षीय टेकेन्द्रराज भट्टराई, तुलसीपुर-११ का ७३ वर्षीय केशव डाँगी घाइते भएका छन्।
त्यस्तै, अर्को गाडीमा सवार तुलसीपुर-७ खर्चुवाका ५१ वर्षीय विष्णु बुढाथोकी, तुलसीपुर-८ की ३९ वर्षीया सबिता शर्मा, तुलसीपुर-४ बनहरीका ७० वर्षीय एमलाल पार्धे, तुलसीपुर-५ का ३२ वर्षीय तुफान केसी, र तुलसीपुर-१९ का २२ वर्षीय नवराज खत्री समेत घाइते भएका हुन्।
सबै घाइतेको उपचार राप्ती प्रादेशिक अस्पताल, तुलसीपुरमा गरिएको हो। अस्पताल स्रोतका अनुसार लेखराज बस्नेत, जयन्ती बस्नेत र एमलाल पार्धेको उपचार हाल पनि जारी छ भने अन्य घाइतेलाई उपचारपछि घर पठाइएको छ।
दुर्घटनामा संलग्न सवारीसाधनलाई प्रहरीले नियन्त्रणमा लिएको छ। प्रहरी चौकी बिजौरीका प्रमुख सई भरत ओलीका अनुसार घटनाको अनुसन्धान भइरहेको छ।
