रुरु क्षेत्रलाई आर्कषक पर्यटकीय केन्द्र बनाउने योजना अनुसार रिडीमा कालीगण्डकी नदी तथा रिडी खोला नियन्त्रण आयोजनाको आज माननीय मुख्यमन्त्री शंकर पोखरेलले शिलान्यास गर्नुभयो ।
रुरु क्षेत्रमा पर्यटन पूर्वाधार विकासका लागि ७९ वटा कार्यक्रममध्येको तटबन्ध एक हो । सगुन जेभीले दुईवर्ष ६ महिना सक्ने गरी ३४ करोड २० लाख ६० हजार रुपैंयामा ठेक्का लिएको छ ।
सो अवसरमा बोल्दै मुख्यमन्त्रीले रिडीको धार्मिक र ऐतिहासिक महत्वलाई बढाउन र आर्कषक गन्तव्य बनाउन प्रदेश सरकारले प्राथमिकताका साथ काम अघि बढाएको बताउनुभयो । उहाँले तटबन्ध मात्रै नभएर अब समग्र आयोजना अघि बढ्ने र बजेटको कुनै समस्या नहुने बताउँदै समयसीमाभित्रै गुणस्तरीय काम सम्पन्न गर्न निर्देशन दिनुभयो । उहाँले राज्यको लगानी र समुदायको अपनत्वबाट मात्रै विकासको प्रतिफल प्राप्त गर्न सकिने भएकाले सबै मिलेर प्रतिफल प्राप्त गर्न अघि बढ्नुपर्ने बताउनुभयो ।
उद्योग, पर्यटन, वन तथा वातावरणमन्त्री लिला गिरीले पर्यटन पूर्वाधार विकासमा प्रदेश सरकारले प्राथमिकताका साथ काम गरेको बताउनुभयो । उहाँले धार्मिक स्थल रिडीको विकास अब गुरुयोजना अनुसार अघि बढ्ने बताउनुभयो ।
प्रतिनिधिसभा सदस्य सोमप्रसाद पाण्डे, प्रदेशसभा सदस्य कमल श्रेष्ठ, तानसेन नगरपालिका प्रमुख अशोक शाही, रुरु क्षेत्र गाउँपालिका प्रमुख निलकण्ठ गौतम, कांग्रेस जिल्ला सभापति भुवन श्रेष्ठ लगायतले बोल्दै रिडी र पर्यटन विकासका सन्दर्भमा आआफ्नो मन्तव्य राख्नुभयो ।
